zrinsda

... für die kleinen und großen krisen im leben

...lese-empfehlung oberösterreichisch

...oder vertont

und dann zrinsda…


es zarinnda zwischen de händ
wia an kind des am meer vü zvü muscheln gsammelt hat
se tragt voller stolz zum platz von de eltern zruck
und dann mit am ruck oder ganz seelig vertramt
valierts es de muscheln ane nach da andern

genau so geht’s da manchmal im leben 
wo du grad eben nu alle sieben zwetschgen beinander hast
und glaubst dassd an plan hast oder zumindest a idee
gspiast di wia oben auf da heh und bist fein

und auf amol zrinsda…
es zarinnda zwischen de händ
fallt da obe de idee, da sinn und da unsinn glei dazua
es lasst dir ka ruah und du vakopfst immer mehr 
und dein bauch winkt dem verstand ziemlich einsam hinterher

wanns da zrinnd
egal ob greis oder kind
dann hoit stad und gspia eine
lass trauern und rean und vazweifeln und zornig sein zua
gehs durch und geh weida
gspia weida 

und dann wennst moanst das passt dann 
mach di wieda aufn weg
schau in deine finger
wo grod gar ka plotz mehr woa weil ois voi war
mit muscheln, ideen und an plan
schau in deine händ und gfrei di üba so vü platz
wo du jetzt einetuan kannst was DU magst
und net mehr nua des was se dir dein leben lang eigredt ham

geh zruck zu deim bauch mit deim hirn
grinsts eich an und geht’s weida mitanaund
glaubst auf wos eich passt
lassts liegen was eich stört
und bittgarschen
höfts eich beim tragen 
das net boid wieda zrinnt

machs guat und 
schen gruass von deim inneren kind